Fevralın 6-da Şəki-Zaqatala Regional Təhsil İdarəsinin rəhbərliyi tərəfindən Qəbələ rayonuna səfər zamanı təmirə ehtiyacı olan Ehtiram Səmədov adına Mamaylı kənd tam orta məktəbinə baxış keçirilib, məktəbin kollektivi ilə söhbət aparılıb. Məktəbdəki mövcud şəraitlə tanış olan Şəki-Zaqatala Regional Təhsil İdarəsinin müdiri vəzifəsini icra edən, müdir müavini Günay Mahmudova müvafiq şəxslərə təhsil müəssisəsində ilkin olaraq aparılacaq təmir işlərinin sürətləndirilməsi üçün tapşırıqlar verib.

Qeyd edək ki, son 2 ildə Şəki-Zaqatala Regional Təhsil İdarəsinin tabeliyində fəaliyyət göstərən təhsil müəssisələrinin 30-da cari, 1-də əsaslı təmir işləri aparılıb, 6 məktəb isə sökülərək yenidən tikilib. O cümlədən son iki ildə Qəbələ rayonunda 2 məktəb binası yeni tikilib, 21 məktəbdə isə cari təmir işləri aparılaraq şagirdlərin istifadəsinə verilib.