Noyabrın 25-də Azərbaycan kino sənətinin görkəmli nümayəndəsi, kinorejissor, SSRİ və respublika dövlət mükafatları laureatı, Xalq artisti Rasim Ocaqovun anadan olmasının 90 illik yubileyi qeyd olunub.

Yubiley tədbirinin iştirakçıları əvvəlcə Rasim Ocaqov adına Şəki Uşaq-Gənclər İnkişaf Mərkəzi ilə tanış olub, uşaqların əl işlərindən ibarət sərgiyə baxıb, bədii proqramı izləyiblər.

Şəhər rəhbərliyi, sənətkarın ailə üzvləri və sənət dostları, yubiley tədbirinə dəvət olunan qonaqlar sonra Rasim Ocaqovun şəhərin Sülh meydanında, “Güyümlər” dairəsi adlanan ərazidə qoyulmuş barelyefi önünə gül dəstələri düzüb, sənətkarın xatirəsini ehtiramla yad ediblər.

Şəki Dövlət Dram Teatrında keçirilən yubiley tədbirinin iştirakçıları əvvəlcə teatrın foyesində kinorejissorun həyat və yaradıcılığından bəhs edən fotosərgiyə baxıblar. Kinorejissorun çəkdiyi filmlərdən fraqmentlər, ekran əsərlərində rol almış aktyorların yaratdıqları obrazlar, çəkiliş meydançalarından görüntülər və digər fotolar tədbir iştirakçıları tərəfindən böyük maraqla qarşılanıb.

Yubiley tədbiri teatrın böyük zalında davam etdirilib. Tədbirdə Rasim Ocaqovun həyat və yaradıcılığı barədə sənədli film nümayiş etdirilib, kinorejissorun fəaliyyətinə dair bədii proqram təqdim olunub.

Yubiley tədbirində çıxış edən şəhər icra hakimiyyətinin başçısı Elxan Usubov görkəmli kinorejissorun 90 illiyinin qeyd olunmasının Şəki şəhərinin mədəni həyatında çox əlamətdar hadisə olduğunu bildirib. Vurğulanıb ki, Rasim Ocaqov Şəki şəhərini çox sevirdi. Onun xatirəsi Şəki şəhərində də daim əziz tutulur. Diqqətə çatdırılıb ki, Şəkidə Rasim Ocaqovun yaşadığı evə xatirə lövhəsi vurulub, “Güyümlər” dairəsində barelyefi qoyulub. Şəki Uşaq-Gənclər İnkişaf Mərkəzi sənətkarın adını daşıyır. Şəki şəhərində Rasim Ocaqovun adını daşıyan küçə var.

Daha sonra Rasim Ocaqovun ailə üzvləri adından nəvəsi Nərminə Həsənova çıxış edərək yubiley gecəsinin yüksək səviyyədə təşkilinə görə təşkilatçılara minnətdarlığını bildirib.

Sonda Rasim Ocaqovun ailə üzvlərinə yubiley gecəsi ilə bağlı xatirə hədiyyələri təqdim olunub.

Qeyd edək ki, hazırda Rasim Ocaqov adını daşıyan Şəki Uşaq-Gənclər İnkişaf Mərkəzdə ümumilikdə 71 dərnək fəaliyyət göstərir. Bu dərnəklərdə 1065 şagird təhsil alır. Uşaqların təlim-tədrisi ilə 50 müəllim məşğul olur.