Şəki-Zaqatala Regional Təhsil İdarəsinin tabeliyində fəaliyyət göstərən ümumi təhsil məktəblərinin VIII-XI sinif şagirdləri arasında Azərbaycan dili və ədəbiyyat, riyaziyyat, fizika, kimya, biologiya, informatika,coğrafiya və tarix fənləri üzrə “Zəfər” elm olimpiadası keçiriləcək.

Olimpiadada iştirak etmək istəyən Azərbaycan bölməsində təhsil alan şagirdlər 11-25 oktyabr 2023-cü il tarixədək qeyd olunan link (https://forms.gle/8YwR66L82jzE6cPy5) vasitəsilə qeydiyyatdan keçə bilərlər.

Online formatında təşkil olunacaq olimpiadanın birinci mərhələsi oktyabrın 28-də, ikinci mərhələsi isə noyabr ayında təşkil olunacaq. İlk mərhələdə olduğu kimi, ikinci mərhələdə də 25 test sualının cavablandırılması üçün şagirdlərə 2 saat vaxt (120 dəq) ayrılacaqdır.

İkinci mərhələnin nəticələrinə əsasən, yüksək nəticə əldə etmiş şagirdlər diplom, medal və hədiyyələrlə təltif olunacaqlar.

Qeyd edək ki, olimpiadanın keçirilməsində məqsəd müzəffər ordumuzun dövlətçilik tariximizdə mühüm əhəmiyyət daşıyan Vətən müharibəsində qazandığı şanlı zəfəri əbədiləşdirmək, eləcə də yaradıcı təfəkkürü ilə fərqlənən, istedadlı şagirdlərin aşkara çıxarılması, regionda fənn olimpiadalarına marağın artırılmasından ibarətdir.