Birinci Müəllim Mübadilə Proqramı Türk Dövlətləri Təşkilatı, Azərbaycan Respublikası Təhsil Nazirliyi və Türkiyə Milli Təhsil Nazirliyinin təşkilatçılığı ilə türk dünyası ölkələri arasında ilk dəfə olaraq birinci müəllim mübadilə proqramı həyata keçirilib.

Türkiyədə keçirilən mübadilə proqramında Azərbaycanı təmsil edən 5 müəllimdən biri də Nail İbrahimli adına Oğuz şəhər 3 nömrəli məktəb-liseyin tarix müəllimi Mətanət Kərimova olub.

Proqram çərçivəsində müəllimlər “Öyrətmədə yeni metodlar, tədris prosesində yeni yanaşmalar”, “Lider müəllim-lider rəhbər”, "Türk Təhsil Sisteminin tanıtımı ", "Covid 19 zamanı Türkiyədə məsafədən təhsil", "Qiymətləndirmə və qiymətləndirmədə yeni yanaşmalar", "Özəl təhsil və Rəhbərlik Mərkəzləri ilə tanışlıq", "Texniki və peşə məktəbləri ilə tanışlıq" mövzularında seminar, təlimlərdə iştirak edib. Mədəniyyət proqramı çərçivəsində isə iştirakçılar Ankara və İstanbulun tarixi yerlərinə, mədəniyyət mərkəzlərinə səfər ediblər.

Qeyd edək ki, təşkil olunan proqramın məqsədi qabaqcıl müəllimləri bir araya toplayaraq əməkdaşlığı inkişaf etdirmək, təcrübə mübadiləsi aparmaq, tədris prosesində yeni üsul və metodları tətbiq etməkdir.