“Yol hərəkəti qaydaları uşaqların gözü ilə” adlı rəsm müsabiqəsində qalib olmuş şagirdlərlə görüş keçirilib.

Şəki şəhər Təhsil Şöbəsinin akt zalında keçirilən görüşdə Təhsil Şöbəsinin əməkdaşları, Şəki Şəhər-Rayon Polis Şöbəsinin Dövlət Yol Polis Bölməsinin təbliğat və təşviqat üzrə inspektoru, polis baş leytenantı Tural Niftalıyev və fərqlənən şagirdlər iştirak ediblər.

Müsabiqə “Azərbaycan Respublikasında yol hərəkəti təhlükəsizliyinə dair 2019-2023-cü illər üçün Dövlət Proqramı”nın məqsədlərinə uyğun olaraq Baş Dövlət Yol Polisi İdarəsinin təbliğatla bağlı müvafiq Tədbirlər Planı çərçivəsində həyata keçirilib. Müsabiqənin məqsədi uşaq və yeniyetmələr arasında yol hərəkəti təhlükəsizliyinə dair bilik və vərdişlərin inkişaf etdirilməsi, onların yol hərəkəti qaydaları haqqında biliklərinin artırılması, eləcə də uşaq travmatizminin qarşısının alınmasında ictimai həmrəyliyə nail olunmasıdır. Müsabiqəyə respublikanın 43 şəhər və rayonundan 335 rəsm əsəri təqdim olunub. I, II və III yerlərdən başqa münsiflər tərəfindən 36 nəfər fərqlənən iştirakçının təltif edilməsi də qərara alınıb. Onlardan 6-sı Şəki məktəblilərinin payına düşüb.

Görüşdə müsabiqə qaliblərini təbrik edən Şəki Şəhər Təhsil Şöbəsinin müdiri Südabər İsmayılova təşkilatçılara öz təşəkkürünü ifadə edib və qalibləri təbrik edib

Daha sonra şöbə müdiri S.İsmayılova Dövlət Yol Polis Bölməsinin təbliğat və təşviqat üzrə inspektoru, polis baş leytenantı Tural Niftalıyevi, uşaq və yeniyetmələrlə bağlı yol-nəqliyyat hadisələrinin qarşısının alınması istiqamətində Şəki Şəhər Təhsil Şöbəsi o cümlədən ümumtəhsil müəssisələri ilə sıx əməkdaşlıq edərək şagirdlərə piyadanın vəzifələrinin öyrədilməsi üçün fəal maarifləndirmə işləri apardığına görə “Məktəblilərin sevimlisi” adına layiq görülməsi barədə mükafatlandırıb.

Qeyd edək ki, şəhər 1 nömrəli tam orta məktəbin şagirdi Əfsanəyə İsmayılova, şəhər 8 nömrəli tam orta məktəbin şagirdi Nihada Mustafazadə, şəhər 10 nömrəli tam orta məktəbin şagirdi Aylinə Atayeva, şəhər 9 nömrəli tam orta məktəbin şagirdləri  Nurana Yusibov,  Sənana Yusibov, Kimya-Biologiya təmayüllü liseyin şagirdi Naziləyə  Mütəfəkiri Baş Dövlət Yol Polisi İdarəsinin “Təşəkkürnamə”ləri təqdim olunub.